何沛珈被揭鍾意「年紀大」 俞可程驚爆「容易受傷」
發佈時間：03:00 2026-09-11 HKT
TVB戀綜《女神配對計劃2》首播即掀全城熱話，周日（13日）播出第二集，5大女神何沛珈（Roxanne）、俞可程（Kanis）、阮嘉敏（Mandy）、陳若思（Amber）、郭珮文（Juliana），將撳燈挑選心水求愛勇者，同時曝光女神「閨密花生團」成員，期間Roxanne就被閨密游嘉欣踢爆鍾意搵「年紀大」，而Kanis就被親家姐揭她是「容易受傷的女人」。
今屆求愛勇者有兩個入圍標準，第一是獲三位或以上女神撳燈支持，第二則是心儀的女神有份撳燈挑選自己，即使只有一位女神撳燈，該名求愛勇者仍有望入圍。今集首位登場是擁41吋胸肌健碩身形、成功人士外表及搞笑「龍舟論」引發關注的關經翰（Oswald），不過Oswald在海選面試時曾坦承有一夜情經驗，引發5大女神關注，Kanis大膽追問：「你試過One Night Stand？喺我心目中有少少扣分！」更追問Oswald：「如果伴侶介意，點俾返信心？」而Roxanne致電閨密游嘉欣請教，獲游游教路「揀咗先」，「雖然佢One Night Stand，但我覺得佢個人都成熟穩重，我覺得不妨了解一下。」而Amber和Mandy也坦言介意Oswald曾有一夜情。
至於第二集曝光女神「閨密花生團」成員，Kanis的閨密是她的親家姐，期間她更被家姐驚爆是「容易受傷的女人」，全因每次分手都好受傷，所以要來幫她搵個好男人，家姐又爆Kanis對男友同對家人是完全兩個樣！而Roxanne則被閨密游游半開玩笑指她鍾意搵「年紀大」，卻口誤講成「我覺得佢應該適合5歲以上」，主持林盛斌即更正是「大5歲以上」。而Mandy、Amber及Juliana則分享邀請各自的閨密鄧依婷、劉倬昕及鄧凱文上節目助陣。
冷氣師傅Oscar狂收私訊
此外，早前率先憑節目一夜爆紅的求愛勇者「混血冷氣師傅」Oscar（方智弘，男團One Up成員），日前接受新城節目《放飯ICU》訪問，大談爆紅後的生活變化、感情觀及演藝夢，Oscar坦言社交網收到大量私訊，有9成半是女性，約6成查詢洗冷氣價錢，兩、三成是為他打氣，有一成則「未必講得」。他又透露心目中女神是韓團aespa成員Giselle。
