周家怡挑戰考賽車牌出意外急送院痛到行唔到揭傷勢現況公開出事一刻直呼恐怖

更新時間：18:00 2026-09-05 HKT
發佈時間：18:00 2026-09-05 HKT

近日YouTube節目《恨駕女團》邀請曾連續奪得香港房車錦標賽總冠軍、並在多項亞洲及世界級賽事中取得佳績的香港知名賽車手盧思豪，為周家怡、李靖筠（Gladys）及海兒三位女將進行特訓，挑戰考取賽車牌。但特訓期間周家怡不幸發生意外，需送往醫院治理。

周家怡直認當刻感覺恐怖

原來周家怡為了做賽車手，事前安排了連串體能訓練：「操咗十幾日，過程可能攰得滯，跟住就整到條腰。我做一個動作，好似Hyrox推wall ball，我接個波嘅時候上身唔夠力，個波就撞咗落去，撞正我椎間盤個位，咁樣就必咗出嚟。」周家怡直認當刻感覺十分恐怖：「直程唔行得，好恐怖㗎嗰吓，我直程覺得：『嘩！揀中咗我！』」

在影片中，周家怡躺在醫院病床上被問到入院原因，她最初笑說：「休息吓囉。」後來她解釋受傷經過，一臉無奈地說：「因為真係痛得好緊要，即刻入咗醫院，變咗無奈地（拍攝）要停。本來為咗安全起見，曾提議取消整個企劃，不過我覺得咁難得開咗個頭，我唔知大家想唔想，但我都好想嘅，哈哈。我就覺得不如搞啦，唔好停啦。老人家成日都話筋骨100日就好，咁睇吓3個零月係咪再好啲啦。」

幸好一個月後，周家怡康復進度良好，已經可以開車：「唔受傷都唔知道，原來平時一啲好簡單嘅嘢，都好值得感恩可以平時咁樣活動。我受傷之後，連去洗手間坐低都覺得呢個任務好艱辛。」

周家怡在3個月後終於回歸大隊

周家怡在3個月後終於回歸大隊，她表示物理治療師指她已康復超過九成：「喺安全情況下，戴腰封係完全冇問題，係可以賽車。」Gladys亦於這段期間考獲棍波牌；團隊隨後正式出發前往肇慶廣東國際賽車場進行實地賽道特訓。

周家怡受傷的影片曝光後，不少網民留言慰問及擔心她的狀況：「估唔到家怡呢次會出意外！祝早日康復。」、「家怡情況嚴唔嚴重？保重身體，休息多啲，早日康復再拍多啲好節目。」、「我都好似你咁受傷過，千祈唔好做粗重嘢，我要戴兩個月腰封，祝早日康復。」、「等啲的士師傅傳授分享吓畀家怡姐姐喇，平日見駕駛座沒有護腰設備，用毛巾圈起一個圓柱體，放喺座位尾角邊位護腰，長時間揸車都冇咁傷。」

昨日（4日）周家怡於社交平台發文報平安，叫大家不用擔心：「多謝各位問候，受傷已經係之前嘅事嚟啦，只係因為《恨駕女團》啱啱出呢一集，所以會令大家誤會，唔好意思要大家擔心，我冇嘢呀，好腰好腎好女人呀！」