尹天照經歷生死悟人生嘆香港搵錢唔多使得辛苦北上生活無壓力：兩支針平過香港四千

更新時間：09:00 2026-10-25 HKT
發佈時間：09:00 2026-10-25 HKT

「亞視一哥」尹天照在90年代憑藉亞視神劇《我和殭屍有個約會》中「況天佑」一角而紅遍中港台，攀上事業巔峰。尹天照在1999年與圈外太太 Teresa 結婚，不過在2011年Teresa不幸罹患血癌，尹天照為了照顧太太，毅然推掉大部分演藝工作，全心全意照顧妻子，但當時有指他亦因為亦太擔心出現類風濕痛症，工作減少再加上醫療、生活等支出龐大，收入一度歸零。

尹天照嘆香港搵錢搵得好辛苦

不過尹天照未有改變想法，甚至曾跪地祈禱求上帝以命換妻健康。在不離不棄的照顧下，太太最終奇蹟康復，而走過生死關頭的尹天照亦因信仰改變人生觀。近年尹天照有限度復出，主力在內地拍攝網絡電影及商演主。日前尹天照接受資深傳媒人汪曼玲的Youtube的訪問，移居內地多時的尹天照有意在內地置業：「香港真係好慘，我哋搵錢搵得好辛苦，又唔係話搵好多，但係我哋洗費好大，而家睇到好多香港人，都移居去內地，開開心心，食得好、住得好，人冇壓力，健康就自然好。」

尹天照多年來飽受類風濕痛症的困擾

尹天照多年來飽受類風濕痛症的困擾：「類風濕唔會死人，但係係一種折磨，我試過痛到起初連拎被子都拎唔到，要用第二隻手拎。跟住我睇醫生，藥又貴，開咗藥要咁咁咁又要打針咁，跟住醫生叫一定要運動，我咪話朝早去做游水，兩千公尺、40個塘，之後返去做健身，兩、三個鐘頭，因為我有類風濕，所以更加要唔好畀佢控制我。」最後尹天照真是成功了：「冇人知我有類風濕，但係因為有咗這個類風濕，我先知道當年我大哥係幾辛苦。我大哥係是類風濕走咗，因為去到身體最差嗰陣，係會有其他併發症。」現時尹天照與太太在番禺買了間屋，生活在平靜之中：「其實做人年又有多個幾十年，喺呢個時間，只要自己有錢的，我個人認為應該兩公婆開開心心，去玩埋下半生。我本身乜都冇，;物業全部都係寫畀佢，除咗係內地嗰層。我覺得名份真係唔重要，就算離婚都要分一半畀佢，我信我太太，我太太信我，我覺得冇嘢比信更加重要。」

尹天照計劃賣埋香港層樓定居番禺

尹天照與Teresa經歷了16年愛情長跑於1999年才結婚，多年來二人未有仔女，尹天照直言因為驚：「驚冇養，如果當其時，我哋真係生bb，冇幾耐就病，咁真係好大鑊了，呢個病要使好多錢，仲點供書教學？老老實實，我覺得人生裏面，我哋嚟到呢個世界日子唔係好長，而家都50幾、60，係咪應該開開心心，我連嗰啲朋友，覺得你係好朋友就大家在一齊。唔係好朋友就算了，無謂講咁多，我覺得生命其實真係好短暫。」不過尹天照表示太太曾經有過想生仔的念頭：「但係嗰陣環境同埋嗰個時間都唔係適當嘅時間，結果咁樣。我覺得人生好多嘢都係安排好，宇宙咁大，地球咁多人，最緊要係喺我有生之年，兩個人，開開心心就夠。」尹天照憶述太太患病時，花了逾百萬醫病：「我太太有買保險，但係有乜嘢重要得過生命？我而家想賣埋香港呢層樓，大家開開心心喺番禺，香港租層樓。我試過同朋友睇樓，四間房、一個大廳，三個廁所仲兩個大露台，只不過係350萬，我心諗喺香港車位都200幾萬，我買咗個車位，補多100萬入嚟，我就可以有咁大。」但還有一樣最重要是覆診問題：「我哋都要覆診，而家密謀返內地覆診。我啱啱喺覆完診，本來有啲針佢哋係冇，但係都幫我搵到，仲要平過香港，講緊兩支針平過香港三、四千蚊。」