一周星星｜張智霖太陰險逼喊高海寧？好心慰問慘食檸檬張曦雯細數吳卓羲優點：講唔晒

更新時間：17:30 2026-10-25 HKT
發佈時間：17:30 2026-10-25 HKT

TVB熱播台慶劇《璀璨之城》一眾主演張智霖、吳卓羲、高海寧、張曦雯及江美儀，日前齊集娛樂訪談節目《一周星星》接受主持區永權訪問，節目於今晚（25日）播出，眾人大談鏡頭後的爆笑與辛酸。張智霖今次罕有挑戰大反派「官孝賢」大獲好評，劇中飾演其妻的高海寧笑言：「我唔敢講啊！驚佢折磨我。」眾人更公認他「笑住嚟奸」兼最陰險，江美儀亦直言他「陰陰濕濕好恐怖」。雖然角色備受觀眾肯定，但自我要求極高的張智霖坦言睇番片段仍嫌未夠完美。對此江美儀即送上定心丸給予高度評價：「我成日同人講呢套戲一定要睇張智霖，上次Cool魔可以10年，呢個係佢第二個10年！」

高海寧崩潰爆喊拒張智霖

豪門家族勾心鬥角劇情緊湊，高海寧自爆拍攝期間曾被逼至情緒臨界點，更一度崩潰：「我最後係逼到自己匿埋喺窗簾後面喊。」面對對手戲連場的高海寧崩潰落淚，張智霖隨即搞笑「自首」，大爆當時好心慰問卻慘食檸檬：「Cut咗機之後，佢自己縮埋一角喊，我心諗死嘞！我係咪過分咗呢？問佢OK嗎？都未講完，佢話『唔好掂我』，冇咩事我出去先。」引來全場大笑。

張曦雯甜讚吳卓羲戲假情真

除了互相爆料，今集「本尊Fact Check」環節更直接查證張曦雯與吳卓羲的戲假情真傳聞。訪談中張智霖頻頻取笑吳卓羲對女方處處維護，當張曦雯被問到這位劇中拍檔有甚麼優點時，即甜笑幽默神回：「多到講唔晒，《兩周星星》先得喎！」甜度爆燈。此外，節目亦設有隔空提問環節，請來黃宗澤（Bosco）、薛家燕、陳豪（Moses）、王丹妮等隔空提問，包括：「Chilam，你會讓兒子入娛樂圈嗎？」、「Ron，你有甚麼黑歷史演出？」吳卓羲將罕有自揭入行以來的黑歷史演出。