當個仔係「養兒防老機器」？月入$2萬港男崩潰：無積蓄兩老未夠60歲突退休網民驚爆或有陰謀｜Juicy叮

時事熱話

更新時間：11:05 2026-09-22 HKT
發佈時間：11:05 2026-09-22 HKT

當個仔係「養兒防老機器」？月入$2萬港男崩潰：無積蓄兩老未夠60歲突退休網民驚爆或有陰謀｜Juicy叮

一名月入2萬元的廿多歲港男近日崩潰爆料，指家中無積蓄的基層父母未滿 60歲，竟突然開心宣告退休「等阿仔養」，令他大嘆「前路好黑暗」。

網民似乎有切膚之痛，批評兩老「當個仔係『養兒防老機器』」，甚至獻計著他們去「考保安牌」自力更生。不過，有網民驚爆陰謀論，指可能係終極考驗，兩老其實「一早收埋幾百萬」。詳情見下圖及下文：

當個仔係「養兒防老機器」？月入$2萬港男崩潰：無積蓄兩老未夠60歲突退休網民驚爆或有陰謀逐張睇↓↓↓↓

樓主：準備等我養

樓主昨天（21日）在社交平台 Threads發帖，自爆：「基層家庭父母退休，父母突然好開心同我講佢哋要退休。」

樓主坦言自己「廿幾歲仔，每月得 20K（$2萬元）收入」，聽到消息的瞬間徹底崩潰。由於父母還未到 60歲，他直言：「佢哋無準備退休嘅積蓄，準備等我養，我一條友點養兩個人？」

面對沉重的家庭負擔，樓主悲觀大嘆：「我仲有好多嘢想做，覺得前路好黑暗，我呢世係咪就咁樣玩完啦？」

網民斥兩老不負責任

網民大都力挺樓主，批評兩老自私。有人指出：「佢哋只係當你係養兒防老機器。」

亦有同病相憐的苦主大呻：「點解依家仲有啲咁嘅窮父母！我同你一樣，但我大你起碼10年，諗住新一代父母會長進，原來都一Ｘ樣。」該網民更怒斥這類父母「覺得人生就係食瞓屙加少少平價娛樂就夠，完全唔知依個世界有好多新嘢可以去試」。

不少網民直言，以樓主的收入根本無法支撐。有網民質疑：「咁都夠膽退休？兩皮一個人都唔夠使啦，仲要養埋兩老，最多你畀幾千蚊家用佢哋自己搞掂，佢哋唔夠用就番返工。」

也有人直言「兩份人工3個使，依家一份人工3個使，要真誠同佢哋傾傾」，並勸喻「唔好玩啦！你可以畀到幾多家用啫，同父母傾，你都要為將來打算！」

但有人理性指出「始終都係父母，千祈唔好諗自己一個養兩個，但亦都唔好諗唔理佢哋」，直言「既然佢哋一直對你唔差，咁你都要負返責任」。

有網民則認為這對父母不負責任：「你叫佢哋計條數，你一個搵 20K 點樣養到佢哋到老？建議先小人後君子，講到明會畀幾錢家用畀佢哋，你都要為自己打算。」

網民獻計：促考保安牌

面對困局，網民熱心獻計，有人主張強硬反擊：「佢哋咁開心咪睇佢哋開心得幾耐囉，有能力就搬走，一蚊都唔好畀，但乜都唔使講同唔好講。」

有網民分享自身成功經驗：「叫佢哋去考保安牌！我老竇病咗喺屋企 hea 咗3個月，我媽即迫我老竇落樓下做保安，因為平時佢都係喺屋企 hea，雖然一日得 $500 左右，好過無。」有網民亦提議：「兩皮自己都養唔掂點養佢哋，幫佢哋整 CV（履歷）推佢哋出去返工吧啦，未夠 60 又冇錢，佢哋日日喺屋企都好快會悶到抽筋！」

亦有網民奇招百出，獻上「苦肉計」反擊。有人提議「同公司請一兩日 AL（大假）先，扮自己畀人炒，話出去搵工搵咗成個月都冇人請。」

或跟兩老講：「我失咗業，依家出街係扮工，對唔住，一直瞞住你哋。」甚至有人建議「畀啲危機意識佢哋」，大可以跟他們傾談，直接講「我得 20K 收入，自己都未顧掂自己啊，所以無能力 Support（支持）佢哋退休」，再不然就謊稱「其實公司裁緊員，我自己都未知下個月有冇得返工啊。」

有網民則教路，講明一個自己負擔得到的底線：「例如每月 $6000 家用，只有咁多，唔會再畀，其餘他們自己想辦法。」有人附和「無病無痛唔到 60歲就退休？咁直接同佢哋講每個月最多畀 $3000，其他自己諗」。