張國強入行50年首獲「最佳男主角」感觸良多 永不言休否認為養家 吳海昕37歲願望開心就好
發佈時間：16:45 2026-08-25 HKT
張國強（KK）、吳海昕（Sofiee）、林熙彤、陳安瑩及吳浣儀等今日為港台電視劇《陪我講 一 傾心診所》拍煞科戲，劇組更準備了「最佳男主角」獎項慶祝張國強入行50年，又預備蛋糕為今日37歲正日生日的吳海昕送上祝福。
張國強返到起點再出發
張國強表示50年第一次攞獎，希望憑住這獎可以帶更多作品給大家欣賞，又指由廣播度到現在一轉眼就50年，現在拍回港台劇，似回到起點，又感觸說：「因為呢50年𥚃面高山低谷都經過好多，咁所以今次由開始個度又再起步，係非常之開心嘅一件事。」
吳海昕睇劇本喊幾次
張國強與吳海昕在劇中演父女，兩人均演醫生，又指劇中有不少揪心劇情，吳海昕指睇劇本時喊了幾次，又指因張國強樣貌好像自己爸爸，所以易入戲，提到吳海昕最近的戲都催淚，問她是否想做「淚之女王」？她笑言不想喊咁多，至於她有份演出的《日落下的彩虹》搞到好多觀眾喊，問到今次父母情是否有信心延續令觀眾狂喊？兩人就認為這套劇也有一定的威力，張國強坦言一般演員都不敢跟港台合作，因為他們要求好高、價錢好低：「但一攞劇本之後，再睇佢哋拍攝嘅認真程度，同揀角真係揀得好，我覺得係今次俾我感覺，每一個演員真係好超水準。」
張國強自由身永不言休
對於入行50年，張國強覺得好大感觸：「呢50年𥚃面我都係經歷咗好多嘅高高低低，所以今次攞到個獎，我覺得係一個認同，無論真與假都係一個認同，仲做到50年，係非常之開心，係好難得一件事。」他又指與TVB在3年前已用另一個形式合作，現在自由身，有適合的角色也可以回去拍攝，至於是否永不言休？他說：「我一路都好熱愛呢份工作，同埋我唔識做其他嘢，50年𥚃而家就再俾我另外一個機會，我頭先都有講，我喺TVB嘅廣播道起步，若干年後返嚟，幾好彩可以話叫做男主角，好開心。（之前話要養家所以唔退休。）其實唔係話一定係養家，所謂養家係講笑，即係我自己好鍾意、好熱愛生活嘅人，又好鍾意工作。」
吳海昕被網民掛住好感動
至於今日37歲生日的吳海昕就表示生日願望是「開心就好」，她坦言自己本身性格都幾樂觀，現在更有一種鬆弛感，沒有再想要什麼目標，總之有工開，能與大家相聚就已經好幸福和開心：「之前我喺網上面見到啲人話好耐冇見過我，跟住我都好感動，覺得原來咁耐冇拍戲，大家都仲記得我，我已經好知足。」
