鄧梓峰親解20億身家真相 揭加入神秘共濟會體驗 自嘲最卑微｜獨家
發佈時間：08:15 2026-10-30 HKT
「隱形富豪」鄧梓峰被傳家族身家高達20億，他接受《星島頭條》訪問時卻否認「富二代」標籤，自嘲雖然計不到身家，但強調仍努力工作兼生活節儉，不但搭2蚊巴士、舊衫更着足20年。另外，他親自拆解神秘組織「共濟會」的內部運作與階級謎思！採訪︰方騫平、攝影︰羅安強、場地︰香港飛行總會餐廳
鄧梓峰︰我得200億咋
鄧梓峰否認多年來家勢顯赫傳聞：「事實上我曾經好認真去計吓，但我計唔到囉，可能成個家庭計埋一億就有嘅。」他風趣笑說：「我本來想話我有200億，你而家講小咗我180億，搞到我幾冇面呀？不過，話我有錢，永遠好過話我爭（錢），所以冇刻意去澄清囉！」生活富庶的鄧梓峰卻非常節儉：「我一家人去旅行，我都係用哩數換。（都可以換商務機位啫？）哈！但我又唔捨得呀，計吓計吓11、12個鐘啫，睇兩套戲就落機啦。我而家成日用樂悠咭搭兩蚊雞巴士，更加唔需要請司機，我唔知有乜工作畀佢。」
鄧梓峰最捨得買鞋
他唯一高消費是買名牌，對「貴買平着」更有一套理論：「我唔追款，係追個人風格，追款係最老襯嘅一樣嘢，包括電話，影靚相咪搵朋友影囉。」他隨即展示手上的早期舊款電話。對於被笑孤寒，他堅持只是懂得珍惜，會找裁縫改舊西裝，故要求買大一點再改細，必要時放布。又會買一對3000至4000蚊，可以着好多年的「手上線」靚鞋：「對鞋陪住我行過好多地方，有過開心回憶，可以補換鞋底就修補。」他近年亦發現大眾化平價時裝款式（fast fashion）設計出色，只要配搭得宜即可。
鄧梓峰忌諱「富二代」之名
他直言忌諱「富二代」名詞：「成日覺得『富二代』去形容一個人帶有貶義，就代表佢不善生產，只係追求生活享受，但係我可以話畀你聽，我仍然好努力去工作。」若一定要標籤，「隱形富豪」會比較好啲。
鄧梓峰分享生存之道
談圈中坎坷經歷，他回想20年前成為「爆騷王」，豈料有段時間突然被停工。原來「一朝天子一朝臣」，每次監製要求他做節目都被剔除，然而他並無懷疑人生，反而在司儀界冇去路時為自己尋找缺口，轉戰拍劇，拍過《天涯俠醫》、《衝上雲霄》等大劇：「跟嘟姐（鄭裕玲）做《城市追擊》時，佢見證我為咗考飛機師牌，攞住幾本航空知識書嚟讀，無非為自己搵返信心。」他寄語同行，面對挫折最重要是增值自己，不要畀AI取替。即使有足夠條件「躺平」，他亦堅持不停步：「躺平人生就冇意義喇！我希望可以將樂觀輕鬆嘅態度去感染別人，喺壓力之中得到空間透吓氣，呢個係我最重要嘅意義。」所以喜歡「輕輕鬆鬆鄧梓峰」，也感恩封為「巴斯光年」帶給人開心，而「十郎」都好似好親切。
鄧梓峰公開入會體驗
最近鄧梓峰被揭為神秘組織共濟會會員，身份意外曝光後，暫未有藝人叫他引薦入會。他拆解大家對該會謬誤：「其實係大家少接觸呢個會啫，你可以等同係扶輪社咁睇，大家都係講一種兄弟嘅友情，有機會做下善事，分享哲學、人生理念、價值觀。」他覺得入會體驗幾好，就好似定期開個會咁，大家一齊坐埋研討一啲題目，會從中反省人生目標、怎樣教下一代。對於外間對該會有兩極看法，他說：「如果你覺得係邪教嘅話，就永遠覺得係邪惡，所以我唔需要講。」他透露身份曝光後，最有趣很多人從學術角度研究香港共濟會歷史，甚至到墳場拍有標誌墓碑：「我覺得都好嘅，都可以畀人從另一個角度去認識呢個會。」
鄧梓峰︰唔好諗住入去派卡片
他更特別提醒：「千祈唔好諗住入去派卡片，周圍識多啲人，攞多啲商業機會，真係冇㗎，唔會因為咁而擴闊好多。」對於會員個個有頭有面，他幽默笑說：「我入到去要鞠躬叫大佬㗎，因為大佬唔係我嘛……我好卑微。」他指其實大家好friendly，會內無階級觀念：「可能喺外面做一個好威水嘅老闆，有機會入到去，分分鐘撞到高級過你嘅你個伙計。」
