張智霖兒子休學與爸爸童年缺失有關？父子檔上台認有私心：點解我要多承擔呢份壓力

TVB台慶劇《璀璨之城》熱播中，剛播出一周即掀起話題。張智霖（Chilam）今次在劇中大膽挑戰極暗黑角色，並與陳瀅及陳曉華有火辣調情戲，破格演出引來網民熱烈討論，令他人氣再度急升。在第7集中，張智霖對高海寧施展的「暗黑豪門虛情假意」哲學句句令人心寒，被網民封為「極品渣男」，幾乎人人喊打。但在現實生活中，張智霖是一個標準好男人，不單愛做家務，與兒子張慕童（魔童）的相處方法，亦令人刮目相看。

魔童陸軍裝造型 竟是張智霖游說成果

近日，張智霖接受資深傳媒人查小欣的YouTube節目《紅查館》訪問。多年來，外界都覺得魔童不單盡得父母的優良真傳，外表甚至比爸爸張智霖還要俊俏。對此，張智霖在節目上一臉自豪地說：「如果喺佢呢個年齡，即係佢19歲、我19歲，咁19歲嘅佢的確係靚仔過19歲嘅我。但係19歲嘅佢，亦都未必贏得過55歲嘅我。」談到魔童的陸軍裝造型，原來是張智霖游說了很久的成果，而媽咪袁詠儀（靚靚）的反應，更是令人爆笑。

相關閱讀：張智霖兒子張慕童神顏再進化？ 跟父再同台顏值神複製父母優點 袁詠儀台下力撐露慈母相

張智霖期望魔童做健康快樂好人

張智霖笑稱魔童其實比較似媽咪，性格與外形都偏向柔和：「佢啲髮型不嬲都比較長，所以我同佢講要有啲剛強啲嘅髮型，咁樣就會啱啱好。有一天佢突然話去剪頭髮，剪完返嚟媽咪見到嚇咗一跳，因為佢好反對。我老婆其實係屈服於習慣性——長頭髮嗰時叫佢唔好剪，剪咗之後又話好想佢留長，我諗人好多時都係馴服於自己嘅習慣。」

近日，魔童在張智霖的個人巡迴演唱會上，擔任結他手為爸爸伴奏。首度登場的魔童表現相當沉沉穩，專注地彈奏著電結他，顯得十分專業，其驚喜亮相頓成全場焦點。其後，「向太」陳嵐在內地節目中大爆魔童為了專心自學音樂，不惜決定放棄（或暫緩）升讀大學。

張智霖對此表示：「其實由佢出世嘅第一天，我哋嘅期望就係希望佢做一個健康快樂嘅好人。我到今日都冇改變我嘅初衷，都係要佢做到健康快樂嘅好人。讀書方面要因材施教，我覺得首先要睇下自己係咪讀書嘅料子。我唔係一個讀書嘅材料，我相信老婆都唔係，應該都差唔多，如果有遺傳嘅可能性話。但我自己雖然冇大學學歷，但我自己好鍾意睇書，好鍾意學一些自己想學嘅嘢。我覺得自己可以喺呢個世界入面吸收更多嘅嘢。我會諗好多嘢，但係嗰啲嘢未必係可以學返嚟嘅，你要自己去體會。因為我自己是一個佛教徒，可能真係覺得每個人本身都已經『具足在內』，不如向內尋找、向內問，入面有好多嘢，未必需要向外求。好多時我都不停同自己反覆思考好多嘢。」

相關閱讀：袁詠儀自爆為老公頻撲做一事竟被「嫌棄」 憂張智霖被質疑「呃錢」插手巡迴演唱會

張智霖與袁詠儀相愛逾30年 婚姻提煉出「不試圖改變對方」

張智霖和袁詠儀由拍拖到結婚已經逾30年，問到婚姻提煉了甚麼東西出來，張智霖說：「唔好去改變任何人。始終冇人係100%完美，包括我自己。如果你夾硬要改變我，我都會唔舒服；等於我要改變你，你都會唔舒服。我覺得要不停磨合大家，磨合久了，之後就變成一體。好似變成一塊鏡，一個波中間有一塊鏡互相睇到對方。大家都能夠睇到對方嘅缺點——我睇到你嘅缺點，你又睇到我嘅缺點，我嘅優點等於你嘅優點，就係咁樣一回事。如果見到對方缺點，都會略略提一下，但好多嘢都係佢自己嘅緣份。佢都有好多優點，我哋唔可以只係話佢呢個缺點會點，佢其他優點都令好多人鍾意佢。做人唔需要為任何人改變自己，鍾意就鍾意，唔鍾意就唔鍾意。」

後來張智霖亦分享了自己一套教仔方式：「每個人都有天性。當然你有一些好惡劣嘅習慣，你咁樣做就會有咁樣嘅後果。我盡量提醒你，但我唔會話你『一定唔可以咁做』。譬如，原來你好鍾意揸快車，你繼續咁樣會畀人吊銷牌照，我已經講明咗。但如果你仲要揸快車，你就要自己去承受呢個結果。好多時我覺得，單靠講係未必有用，嘗試去身教、讓佢親歷其境會比較好。喺佢真係發生咗呢件事、而又未去到不可挽回嘅情況下，你自己作為家長都要睇住，點樣才算『不可挽回』。喺可以挽回嘅情況下，你由得佢去嘗試，由得佢去犯錯，由得佢自己去知，咁樣做真係唔得。」

相關閱讀：璀璨之城｜張智霖蔡一智變宿敵 mean爆掟毛巾惡鬥chilam 劇情無限反轉掀Big Boss揣測熱潮

張智霖情感反射：未與兒子談入行問題

談到魔童休學一年去見識世界，張智霖坦言：「人好多時都係去補償自己童年嘅一些缺失，做每一樣嘢都係想去補返嗰幅圖畫，等自己覺得人生好完整。我都係將呢個情意結，擺咗喺個仔嘅人生道路上。我以前冇嘅（休學見識世界的機會），我以前唔可以咁樣。而家我想你可以咁樣，或者我想將好嘅嘢畀你，其實等於畀咗自己一個情感反射。我以前都冇入大學，一畢業就開始唱〈現代愛情故事〉喇，所以呢啲可能都係我夢寐以求嘅生活。我畀你嘅時候，我又好似畀返自己，係一個情感反射。」

問到魔童是否想加入娛樂圈，張智霖坦言：「我冇同佢討論過呢個話題。因為我覺得其實一切都係命運。即係你做任何一個行業，唔係話你想做、或者你條件好好就得。我見到好多條件好好嘅人，亦都未必可以得到一個等同嘅成就，所以我唔會主動叫佢入行或唔好入行。點樣去判斷呢？佢係鍾意音樂嘅，但我都知（呢行唔容易），我都有將自己嘅經驗講畀佢聽。我會話呢個係一個『套餐』，唔係只得表面開心、一做就成功、然後世界巡迴演出。即係有好多背後嘅嘢，你要去承受。如果你真係要行呢條路，尤其是你而家咁樣嘅家庭背景，你可能會承受更多嘅聲音。因為我哋以前來自普通家庭，比較容易起步；你（魔童）嘅路會困難好多，無端端大眾會攞你同我比較，但其實同我比較啲咩呢？」

相關閱讀：璀璨之城丨陳瀅全裸「腿張開」收25宗投訴 張智霖自爆全家睇激戰陳曉華：外父外母一齊睇

張智霖續說：「我自己唔係星二代，所以我唔知壓力有幾大。但係可以睇到，你做一件事都有咁多迴響，咁多人關注嘅時候，如果係我，我又即刻擺返自己嘅睇法，真係唔容易，點樣去調整自己嘅一個諗法，都係一些功課。大家都要學習，過程都在學習，原來會畀人誤解，俾予人好多奇怪嘅發揮空間。但都係一種學習。某程度上要知道父母係咩身份，或者父母會帶畀佢某一種唔方便。」 至於父子檔上陣，張智霖說：「如果我自己一個人出發，好正常咁去，但係同佢一齊時，反而我仲多咗一份操心。我明明就應該要 focus 點樣去做一場 show，而家要分多一份精力出嚟睇住，可能聽到呢個 chord 你彈錯咗。但係你可能要返到酒店，你先可以同佢講，頭先你彈得唔啱。點解我要多承擔呢份壓力？但亦都係一個好難得嘅機會。係自私嘅做法，想去陪伴佢耐啲。因為細個可能出世到5歲，佢當然好需要你。5到10歲開始返學時，佢開始有朋友。10到15歲又開始有啲青少年嘅成長期。到20歲左右，基本上開始拍拖等等事情，就完全疏離喇。我睇我自己同父母一齊嘅時間，自從入行以後，可能都數得出係幾多次。所以我知道將會失去嘅嘢，而家有機會陪伴喺一齊，點解我唔攞多啲時間？」張智霖表示係欣然接受：「呢啲係畀我將來，我自己再老啲嘅時候，再回想返起，我哋曾經一齊做過呢件事。可以吹下水，唔只係咁簡單，你讀完書之後，已經出去做嘢，或者已經去讀大學，我哋冇見，讀完大學可能根本就唔會再有機會，好似而家咁親密，可以一齊並肩做一件事。」